تاريخ النشر : 07/30/2024, 12:54:35

رواية إلتقينا صدفه الجزء الثالث عشر | النهاية

.... 

ﻗﺮﺭﺕ ﺍﻓﺎﺗﺢ ﻋﻠﻲ ﺑﻬﺪﻭﺀ ﻭﻧﺤﻠﻬﺎ ﺑﺎﻟﺘﺮﺍﺿﻲ ﺑﺪﻭﻥ ﻣﺸﺎﻛﻞ .. ﺷﻔﺘﻪ ﺍﺗﻐﺪﻩ ﻭﺟﺎﻥ ﻧﻌﺴﺎﻥ ﺩﻳﺼﻌﺪ ﻳﻨﺎﻡ .. ﺻﻌﺪﺕ ﻭﺭﺍﻩ ﻧﺎﻡ ﻋﻠﻰ . ﺟﺮﺑﺎﻳﺘﻪ ..

ﻋﻠﻲ ﺍﻃﻠﺐ ﻣﻨﻚ ﻃﻠﺐ ..

ﻛﻮﻟﻲ ﺧﻴﺮ .. ﺟﺎﻭﺑﻨﻲ ﻭﻫﻮ ﻣﺨﻠﻲ ﺍﻟﻤﺨﺪﻩ ﻋﻠﻰ ﺭﺍﺳﻪ ﻭﻣﺨﺪﻩ ﺟﻮﺓ ﺭﺃﺳﻪ ..

ﺍﺭﻳﺪ ﺍﻃﻠﻚ ..

ﻭﺧﺮ ﺍﻟﻤﺨﺪﺓ ﻣﻦ ﻳﻢ ﺭﺃﺳﻪ ﻭﺍﺳﺘﻌﺪﻝ ﻭﻛﻌﺪ ..

ﻫﺎﻱ ﺷﻨﻮ ﻟﻴﺶ .. ﻭﻫﻮ ﻳﻀﺤﻚ .. ﺑﺎﻭﻋﺘﻠﻪ ﻋﺒﺎﻟﻚ ﺟﺎﻥ ﻳﻨﺘﻈﺮ ﺍﺣﺠﻲ ﺑﻬﺎﻟﻤﻮﺿﻮﻉ ..

ﺍﻧﻲ ﻣﺎﺍﺭﻳﺪﻙ ﺑﻌﺪ ﻣﺎﺍﺗﺤﻤﻠﻚ ﺍﻧﻲ ﺍﺗﺤﻤﻠﺘﻚ ﻟﺨﺎﻃﺮ ﺧﺎﻟﻲ ﺍﺭﻳﺪ ﺣﺮﻳﺘﻲ ..

ﺍﻱ ﺷﻜﻮ ﺑﻴﻬﺎ ﻣﺎﻋﻨﺪﻱ ﻣﺸﻜﻠﻪ ..

ﺻﺪﮒ ..

ﺭﺟﻊ ﻣﺪﺩ ﻭﻧﺎﻡ ﻭﻛﺎﻝ ...

ﺍﻱ ﻃﺒﻌﺎ ﺑﺲ ﺍﻛﻮ ﻃﻠﺐ ﺑﺴﻴﻂ ..

ﺍﺳﺘﻐﺮﺑﺖ ﻣﻦ ﻫﺎﻟﻄﻠﺐ ..

ﺷﻨﻮ ﻫﻮ ..

ﺍﺷﻜﺪ ﺗﺪﻓﻌﻴﻦ ﺍﻟﻲ ﻣﻘﺎﺑﻞ ﻫﺎﻟﺤﺮﻳﻪ ..

ﺿﺮﺑﺖ ﻋﻠﻰ ﻭﺟﻬﻲ ﻟﻚ ﺷﺎﺩﻓﻌﻠﻚ ﻫﻮ ﺍﻧﻲ ﺷﻌﻨﺪﻱ ..

ﻟﻴﺶ ﺷﻜﺪ ﺧﻠﻪ ﺍﺑﻮﻳﻪ ﺑﺤﻠﻜﺞ ..

ﻫﺬﺍ ﺣﻘﻲ ﻣﺎﻋﻔﺘﻪ ﺍﻛﺜﺮ ﻣﻦ ٥ﺳﻨﻴﻦ ﺍﺧﺪﻡ ﺑﻴﻪ ﻣﺎﻋﻔﺘﻪ ﻟﺤﻈﻪ ..

ﻫﺬﺍ ﺍﻟﻲ ﻋﻨﺪﻱ ... ﻳﺎﻟﻪ ﻃﻠﻌﻲ ﻣﻦ ﺍﻟﻐﺮﻓﻪ ﺍﺭﻳﺪ ﺍﻧﺎﻡ ﺑﺎﻟﻠﻴﻞ ﻋﻨﺪﻱ ﺳﻬﺮﺓ ﻭﻱ ﺟﻤﺎﻋﺘﻲ ..

ﻳﻌﻨﻲ ﻣﺎﺗﻄﻠﮕﻨﻲ ..

ﺣﻈﺮﻱ ﻛﻢ ﻓﻠﺲ ﻭﺍﻧﻲ ﺑﺎﻟﺨﺪﻣﻪ ..

ﻛﻤﺖ ﺣﻈﺮﺕ ﻏﺮﺍﺿﻲ ﻭﺍﺧﺬﺕ ﺍﻭﺭﺍﻗﻲ ﻭﺑﺪﻟﺖ ﻭﻃﻠﻌﺖ ...

ﺟﺎﻧﻮﺍ ﺧﻴﺮﻳﻪ ﻭﻣﻨﺎﺭ ﻛﺎﻋﺪﺍﺕ ﺑﺎﻟﺤﺪﻳﻘﺔ ﺟﺎﻧﺖ ﺍﻟﺪﻧﻴﺎ ﻋﺼﺮ ﻭﺍﻟﺠﻮ ﻃﻴﺐ ﻭﺍﻟﺼﻴﻒ ﻋﻠﻰ ﺍﻻﺑﻮﺍﺏ ..

ﺻﺎﺣﺖ ﺧﻴﺮﻳﻪ ..

ﻋﻠﻰ ﺧﻴﺮ ﻭﻳﻦ ﺭﺍﻳﺤﻪ ..

ﺭﺍﻳﺤﻪ ﻻﻫﻠﻲ .. ﺭﺟﻠﻲ ﻳﺪﺭﻱ ..

ﻟﻴﺶ ﻋﻨﺪﺝ ﺍﻫﻞ ﻳﻠﻔﻮﺝ ﺍﻧﺘﻲ ﻣﻨﻮ ﻳﺮﻳﺪﺝ ﺍﻟﻠﻪ ﻳﺮﺣﻤﻚ ﺳﻌﺪﻭﻥ ﻫﻮ ﺍﻟﻲ ﺳﺘﺮ ﻋﻠﻴﺞ ﻣﻦ ﺷﻤﺮﻭﺝ ﺑﺎﻟﺸﻮﺍﺭﻉ ..

ﺍﻟﻠﻪ ﻳﺮﺣﻤﻪ ﻟﺨﺎﻟﻲ ﻣﺎﺕ ﻳﺎﻟﻪ ﺍﺭﺗﺎﺡ ﻣﻦ ﻗﻬﺮﺝ ..

ﺍﺟﺘﻲ ﻋﻠﻴﻪ ﻭﺗﻜﻮﻟﻲ ﺍﺭﺟﻌﻲ ﻣﺎﻛﻮ ﻃﻠﻌﻪ ﻟﺞ ..

ﻣﻮ ﺑﻜﻴﻔﺞ ﺧﻴﺮﻳﻪ ﺳﻨﻴﻦ ﻭﺍﻧﻲ ﻣﺘﺤﻤﻠﻪ ﻗﻬﺮﺝ ﻭﺍﻛﻮﻝ ﻋﻴﺐ ﻣﻦ ﺧﺎﻟﻲ ﺟﺮﺗﻨﻲ ﻣﻦ ﺍﻳﺪﻱ ﻭﺗﻜﻮﻟﻲ ﻃﺒﻲ ﺟﻮﺓ ﻟﺞ ﺍﺧﺬﺗﻲ ﻛﻠﺸﻲ ﻣﻦ ﺳﻌﺪﻭﻥ ﻭﻫﺴﻪ ﺗﻄﻠﻌﻴﻦ ﺑﻜﻴﻔﺞ ﺩﻓﻌﺖ ﺃﻳﺪﻫﺎ ﻭﻛﺘﻠﻬﺎ ..

ﻭﺧﺮﻱ ﺍﻳﺪﺝ ﻋﻨﻲ ﺳﻤﻌﺘﻲ ﻟﻮ ﻻ ..

ﻣﺎﺗﻄﻠﻌﻴﻦ ﺗﺒﻘﻴﻦ ﻫﻨﺎ ﺧﺪﺍﻣﻪ ..

ﻣﻨﺎﺭ ﺗﻜﻮﻝ ﻻﻣﻬﺎ ﺩﺧﻠﻲ ﺗﺮﻭﺡ ﻷﻫﻠﻬﺎ ﻭﻧﺨﻠﺺ ﻣﻮ ﻣﻦ ﺷﻔﻨﺎﻫﺎ ﻣﺎﺷﻔﻨﺎ ﺧﻴﺮ ﻫﺎﻟﻔﮕﺮ ﺑﺖ ﺍﻟﻔﮕﺮ ..

ﺍﺧﺬﺕ ﺟﻨﻄﺘﻲ ﻭﺳﺤﺒﺖ ﺍﻳﺪﻱ ﻭﺩﺍﺍﻃﻠﻊ ﺭﻛﻀﺖ ﻭﺭﺍﻱ ﺧﻴﺮﻳﻪ ﺩﻓﻌﺘﻬﺎ ﺑﻘﻮﺓ ﺍﻭ ﻭﻛﻌﺖ ﻭﺻﺮﺧﺖ ﺻﺮﺧﻪ ﻗﻮﻳﻪ ﻣﻨﺎﺭ ﻋﺎﻃﺖ ﺑﺼﻮﺗﻬﺎ ﻳﻮﻡ ﺷﺒﻴﺞ ﻭﺧﻴﺮﻳﻪ ﺗﺘﻮﺟﻊ ﻭﺗﺼﺮﺥ ﻣﻦ ﺭﺟﻠﻬﺎ ﺍﻧﻲ ﺧﻔﺖ ﺍﺧﺬﺕ ﺍﻟﺠﻨﻄﻪ ﻭﺍﻧﻬﺰﻣﺖ ﻭﺍﺳﻤﻊ ﻣﻨﺎﺭ ﺗﺼﻴﺢ ﻣﻴﺲ ﻛﻌﺪﻳﻪ ﻟﻌﻠﻲ ﺑﺴﺮﻋﻪ ..

ﺭﻛﻀﺖ ﺑﺸﺎﺭﻉ ﺷﻔﺖ ﺗﻜﺴﻲ ﺃﺷﺮﺕ ﺍﻟﻪ ﻭﺻﻌﺪﺕ ﻭﺗﻮﺟﻬﺖ ﻻﻫﻠﻲ ..

ﺟﺎﻧﺖ ﺍﻟﺠﻨﻄﻪ ﺑﻴﻬﺎ ﻓﻠﻮﺱ ﺍﺑﻮﻳﻪ ﺍﻟﻲ ﺧﻼﻫﺎ ﺧﺎﻟﻲ ﺍﻟﻪ ﺟﺎﻥ ﻛﺮﻳﻢ ﻭﻳﺪﺭﻱ ﺑﺎﺑﻮﻱ ﺣﺎﻟﻪ ﻭﺍﻛﻒ ﻭﺧﺎﻟﻲ ﺗﺮﻙ ﺧﻴﺮ ﻭﺭﺍﻩ ﺍﻗﻞ ﺷﻲ ﻟﻜﻞ ﻭﺍﺣﺪ ﻓﻠﻮﺱ ﺑﻴﺖ ﻭﺳﻴﺎﺭﻩ ﻣﺎﻋﺪﺍ ﺍﻟﻔﻠﻮﺱ ﺍﻟﻲ ﺑﺎﻟﺒﻨﮓ ﻭﺍﻟﻤﺰﺍﺭﻉ ﺍﻟﻲ ﻋﻨﺪﻩ ﻭﺟﺎﻥ ﻣﺤﺼﻮﻟﻬﻢ ﻭﺣﺪﻩ ﻛﺎﻓﻲ ﺍﻟﻬﻢ ﻳﻌﻴﺸﻮﻥ ﺍﺣﺴﻦ ﺣﻴﺎﻩ ﺑﺲ ﻛﻠﻬﻢ ﻣﺒﺬﺭﻳﻦ ..

ﻭﺍﻟﻠﻪ ﺑﺎﺭﻙ ﺑﺮﺯﻗﻪ ﻻﻥ ﺟﺎﻥ ﻳﺴﺎﻋﺪ ﺍﻟﻔﻘﻴﺮ ..

ﻭﺻﻠﺖ ﻟﺒﻴﺖ ﺍﻫﻠﻲ ﻭﺍﻧﻲ ﺍﺭﺟﻒ ﻓﺘﺖ ﻣﻦ ﻳﻢ ﺑﻴﺖ ﺍﻟﺸﻴﺦ ﻟﻜﻴﺖ ﻫﻮﺳﻪ ﻛﻠﺖ ﺷﺼﺎﺍﻳﺮ ﻫﻨﺎ ﺷﻜﻮ .. ﺑﺎﻭﻋﺖ ﻭﺍﺣﺪ ﻋﺴﻜﺮﻱ ﺟﺎﻥ ﻭﺍﻛﻒ ﻳﺸﺒﻪ ﻋﻤﺎﺭ ﺑﺲ ﺍﻧﻲ ﺟﻨﺖ ﺍﺑﺠﻲ ﻭﻋﻴﻮﻧﻲ ﻣﻐﻮﺭﻛﻪ ﻣﺴﺤﺖ ﺩﻣﻮﻋﻲ ﻭﻛﻠﺖ ﺍﻟﺴﺎﻳﻖ ﺍﻭﻛﻒ ﺫﺑﻨﻲ ﻳﻤﻚ ﻧﺰﻟﺖ ﺑﺎﻭﻋﺖ ﻣﻦ ﺑﻌﻴﺪ ﻋﻠﻴﻪ ﺟﺎﻧﻮﺍ ﻫﻮﺍﻱ ﻭﺍﻛﻔﻴﻦ ﺑﺲ ﻣﻦ ﺷﻔﺖ ﺍﻟﻌﻜﺎﺯ .. ﻛﻠﺖ ﻻ ﻣﻮ ﻫﻮ ﻋﻤﺎﺭ ﻳﻤﺸﻲ ﻋﺪﻝ ﺭﺟﻠﻪ ﻣﺎﺑﻴﻬﺎ ﺷﻲ .. ﺻﻔﻨﺖ ﻛﻠﺖ ﻳﺠﻮﺯ ﻣﻀﺮﻭﺏ ﻭﻓﺘﺮﺓ ﻳﺴﺘﺨﺪﻡ ﻋﻜﺎﺯ ﺑﺲ ﺷﻴﺠﻴﺒﻪ ﻫﻨﺎ .. ﺩﮒ ﺗﻠﻔﻮﻧﻲ ﺑﺎﻟﻠﺤﻈﻪ ﺍﻧﻲ ﻣﺤﺪ ﻳﺘﺼﻞ ﺑﻴﻪ ﺑﺲ ﻋﻠﻲ ﻻﻥ ﻣﺤﺪ ﻋﻨﺪﺓ ﺗﻠﻔﻮﻥ ﻣﻦ ﺍﻫﻠﻲ ﺑﺲ ﻧﺎﺩﻳﻪ ﻭﻧﺎﺩﻳﻪ ﻣﺘﺘﺼﻞ ﺑﻴﻪ .. ﺷﻔﺘﻪ ﻋﻠﻲ ﺩﻳﺘﺼﻞ ﻣﺠﺎﻭﺑﺘﻪ .. ﻗﻔﻠﺖ ﺍﻟﺘﻠﻔﻮﻥ ﻣﻦ ﺍﻟﺨﻮﻑ

ﻭﺻﻠﺖ ﻟﻠﺒﻴﺖ ﺍﺭﺟﻒ ﺩﻛﻴﺖ ﺍﻟﺠﺮﺱ .. ﻃﻠﻌﺘﻠﻲ ﻧﺎﺩﻳﻪ ...

ﻫﻼ ﺷﻌﺠﺐ ﺗﺬﻛﺮﺗﻲ ﻋﻨﺪﺝ ﺍﻫﻞ ..

ﻧﺎﺩﻳﻪ ﺍﺑﻮﻱ ﻫﻨﺎ ..

ﻻ ﻣﺎﻣﻮﺟﻮﺩ ﻳﺠﻲ ﺑﺎﻟﻠﻴﻞ .. ﻟﺞ ﺷﺒﻴﺞ ﺧﻴﺮﺝ ..

ﺗﻌﺎﺭﻛﺖ ﻭﻱ ﻋﻠﻲ ﻭﺍﻣﻪ ﻭﺩﻓﻌﺘﻬﺎ ﺍﻭ ﻭﻛﻌﺖ ﻳﻤﻜﻦ ﺍﻧﻜﺴﺮﺕ ﺭﺟﻠﻬﺎ ﻣﻦ ﺩﻓﻌﺘﻲ ..

ﻋﺰﺍ ﺍﻟﻌﺰﺍﺝ ﻫﺒﺎﻭﻱ ﻏﻴﺮ ﻋﻠﻰ ﻛﻴﻔﺞ ..

ﺍﺳﻮﻳﻠﺞ ﺷﻲ ﺗﺎﻛﻠﻴﻪ

ﺑﺎﻭﻋﺘﻠﻬﺎ ﻫﺎﻱ ﺗﺘﻠﻮﻙ ﺍﻟﻲ ..

ﻧﺎﺩﻳﻪ ﻫﺎﻱ ﻣﻨﺞ ﻣﻦ ﺍﻟﺸﻴﻄﺎﻥ ﻣﻦ ﺷﻮﻛﺖ ﺣﺎﺑﺘﻨﻲ ..

ﺷﻠﻮﻥ ﻣﺎﺍﺣﺒﺞ ﺍﻧﺘﻲ ﻣﻮ ﺑﺖ ﺭﺟﻠﻲ ﺑﺲ ﻛﻠﺸﻲ ﺍﺗﻮﻗﻊ ﻣﻨﺞ ﺍﻻ ﺍﻟﺴﺎﻟﻔﻪ ﺍﻟﻲ ﺩﻛﻴﺘﻴﻬﺎ ﺑﻴﻪ ﻣﻮ ﺍﻧﻲ ﺍﻣﻬﺎ ﻟﺮﻳﻢ ﺗﺮﻳﺪﻳﻦ ﺗﻔﻀﺤﻴﻨﻲ ..

ﺻﺪﻙ ﻭﻳﻨﻬﺎ ﺭﻳﻢ ..

ﺭﺍﺣﺖ ﻫﻴﻪ ﻭﺭﻧﺪ ﺑﻴﺖ ﺍﻟﺠﻮﺍﺭﻳﻦ ﻋﻨﺪﻫﻢ ﻣﺮﺟﻮﺣﻪ ﻳﻠﻌﺒﻮﻥ ﺑﻴﻬﺎ ..

ﻣﺎﺗﺸﺘﺮﻳﻠﻬﺎ ﻣﺮﺟﻮﺣﻪ ﺷﻜﻮ ﺗﺨﻠﻴﻬﺎ ﻳﻢ ﺍﻟﺠﻮﺍﺭﻳﻦ ..

ﺍﺑﻮﺝ ﻣﻮ ﻣﺜﻞ ﻗﺒﻞ ﺗﻌﺒﺎﻥ ﻭﻛﻮﻩ ﻳﺠﺮ ﺍﻟﻨﻔﺲ ..

ﺍﻧﺘﻲ ﺩﻣﺮﺗﻴﻪ ﺟﺎﻥ ﻣﺜﻞ ﺍﻟﻮﺭﺩ ..

ﺍﺳﻤﻌﻲ ﻫﺒﺎﻭﻱ ﻻﺗﻀﻴﻌﻴﻦ ﺍﻟﺴﺎﻟﻔﻪ .. ﺷﻠﻮﻥ ﺍﺟﺎ ﻣﻦ ﮔﻠﺒﺞ ﺗﺴﻮﻳﻦ ﻫﻴﺞ ﻭﺗﻜﻮﻟﻴﻦ ﺑﻴﺘﻲ ﻣﺸﺒﻮﻩ ..

ﺿﺮﺑﺖ ﻋﻠﻰ ﻭﺟﻬﻲ ﺻﺨﺎﻡ ﺍﻟﺼﺨﻤﺞ ﻧﺪﻭ ﺷﻨﻮ ﻫﺎﻟﺤﺠﻲ ..

ﺍﻱ ﺍﺟﻮﻱ ﺟﻴﺶ ﺫﺍﻙ ﺍﻟﻴﻮﻡ ﺑﺤﺠﻪ ﺍﻟﺘﻔﺘﻴﺶ ﻭﻛﺎﻟﻮﻟﻲ ﺍﻟﻲ ﺑﺲ ﺍﻟﺤﻤﺪﻟﻠﻪ ﻣﻮ ﻛﺪﺍﻡ ﺍﺑﻮﺝ ﺍﻟﺒﻴﺖ ﻣﺸﺒﻮﻩ ﺷﻠﻮﻥ ﺗﺴﻮﻳﻦ ﻫﻴﺞ ..

ﻟﺞ ﻭﺍﻟﻠﻪ ﻣﻌﻠﻴﻪ ﻣﻮ ﺣﺒﺎً ﺑﻴﺞ ﻻ ﺍﺧﺎﻑ ﻋﻠﻰ ﺍﺑﻮﻱ ﻻﻳﺼﻴﺮ ﺑﻲ ﺷﻲ ﺻﺢ ﺍﻧﺘﻲ ﻏﻴﺮﺗﻴﻪ ﻋﻠﻴﻪ ﻭﺧﻠﻴﺘﻴﻪ ﻳﺬﻟﻨﻲ ﺳﻨﻴﻦ ﺑﻴﺖ ﻋﻠﻲ ﻭﺧﻴﺮﻳﻪ ﺑﺲ ﻫﻮ ﺍﺑﻮﻱ ﻭﺍﻻﻇﻔﺮ ﻣﺎﻳﻄﻠﻊ ﻣﻦ ﺍﻟﻠﺤﻢ ﻧﺎﺩﻳﻪ ..

ﻳﻌﻨﻲ ﻣﻮ ﺍﻧﺘﻲ ..

ﻟﺞ ﺍﻧﺘﻲ ﺗﺨﺒﻠﺘﻲ ﺻﺪﻙ ﺗﺤﺠﻴﻦ ﺷﻠﻮﻥ ﺍﺳﻮﻱ ﻫﻴﺞ ..

ﺑﺲ ﺷﻠﻮﻥ ﺍﻟﻲ ﺻﺎﺭ ..

ﺳﻮﻟﻔﻴﻠﻲ ﻣﻦ ﺍﻟﺒﺪﺍﻳﻪ ..

ﺣﺠﺘﻠﻲ ﻧﺎﺩﻳﻪ ﺍﻟﻲ ﺻﺎﺭ ..

ﺑﺲ ﻫﺬﺍ ﻣﺎﻳﺪﻝ ﺃﻧﻪ ﻫﻮ ﻳﻌﺮﻓﻨﻲ ﻭﺟﺎﻱ ﻋﻠﻴﻪ ..

ﻳﻤﻌﻮﺩﺓ ﺩﺍﺥ ﻣﻦ ﻋﺮﻑ ﺍﻧﺘﻲ ﻣﺘﺰﻭﺟﻪ ..

ﺗﺬﻛﺮﺕ ﻫﺬﺍ ﺍﻟﻮﻟﺪ ﺍﻟﻲ ﺟﺎﻥ ﻋﻠﻰ ﻋﻜﺎﺯ ..

ﻛﺘﻠﻬﺎ ﺍﻛﻮﻟﺞ ﻧﺎﺩﻳﻪ ﻫﻮ ﺟﺎﻥ ....

ﻓﺘﺢ ﺍﻟﺒﺎﺏ ﺍﺑﻮﻳﻪ ﻭﺳﻜﺘﺖ ﻋﻦ ﺳﺆﺍﻟﻲ ..

ﺷﺎﻓﻨﻲ ﺍﺗﻌﺠﺐ ﻭﻛﺎﻝ .. ﺑﻨﺘﻲ ﻫﺒﻪ ﺷﻠﻮﻧﺞ ..

ﻛﻤﺖ ﺍﺭﻛﺾ ﻋﻠﻴﻪ ﺣﻀﻨﺘﻪ ﻭﺑﺠﻴﺖ ..

ﺷﺒﻴﺞ ﻳﺎﺑﺎ ..

ﻳﺎﺑﺎ ﺗﻌﺒﺖ ﻣﻦ ﻋﻠﻲ ﺍﺭﻳﺪ ﺍﻃﻠﮓ ..

ﻳﺎﺍﺍ .. ﺻﺎﺣﺖ ﻧﺎﺩﻳﻪ ﺷﺘﻄﻠﻜﻴﻦ ﻫﺒﻪ ﺷﺘﻜﻮﻝ ﺍﻟﻌﺎﻟﻢ ﻋﻠﻴﻨﺎ ..

ﻳﺎﺑﺎ ﺗﻌﺒﺖ ﻭﺧﺎﻟﻲ ﻣﻦ ﺭﺍﺡ ﺫﻟﻮﻧﻲ .

ﺑﻨﺘﻲ ﺍﺗﺤﻤﻠﻲ ﺍﻟﻤﻦ ﺗﺮﺟﻌﻴﻦ ..

ﻳﺎﺑﺎ ﺍﻧﻲ ﻋﻨﺪﻱ ﺑﻴﺖ ﺧﻠﻲ ﻧﻜﻌﺪ ﺑﻴﻪ ﺳﻮﻩ ..

ﻣﻨﻴﻦ ﺍﻟﺞ ﺍﻟﺒﻴﺖ ﺧﺎﻟﺞ ﻣﻮ ﻣﺎﺧﺬ ﻋﻠﻴﺞ ﺻﻚ ..

ﻻﻳﺎﺑﺎ ﻫﺎﻱ ﻟﻌﺒﻪ ﺣﺘﻰ ﻣﺎﺍﺗﺼﺮﻑ ﺑﺄﻣﻮﺍﻟﻪ ﻫﻮ ﺧﻼﻫﻢ ﺍﻣﺎﻧﻪ ﻻﻥ ﺭﻓﻌﻮﺍ ﻋﻠﻴﻪ ﻗﻀﻴﻪ ﺣﺠﺮ ..

ﻭﻫﺴﻪ ﺃﻣﻼﻛﻪ ﺭﺟﻌﺘﻴﻬﺎ ﻷﺻﺤﺎﺑﻬﺎ ..

ﻛﻠﺸﻲ ﻧﻄﻴﺖ ﻭﺭﺟﻌﺖ ﻣﺎﻋﻔﺖ ﺷﻲ ﺑﺲ ﺍﻟﺒﻴﺖ ﺍﻟﺼﻐﻴﺮ ﻫﻮ ﺍﻟﻲ ﻃﺒﻌﺎ ﻫﻮ ﻣﻮ ﺻﻐﻴﺮ ﺑﺲ ﻫﻮ ﺍﻗﻞ ﺑﻴﺖ ﻣﺴﺎﺣﻪ ﺑﺎﻟﻨﺴﺒﻪ ﻟﺒﻴﻮﺗﻪ ..

ﺍﻟﻠﻪ ﻳﺮﺣﻤﻪ ﻣﺎﻗﺼﺮ ﻭﻳﺎﺝ ..

ﻭﻻ ﻭﻳﺎﻙ ﻳﺎﺑﺎ ﻫﺎﻱ ﺍﻣﺎﻧﻪ ﻋﺎﻓﻬﺎ ﺍﻟﻚ ﻛﺎﻝ ﺍﻧﻄﻴﻬﺎ ﻻﺑﻮﺝ ﻣﻦ ﺍﻣﻮﺕ ..

ﻧﺎﺩﻳﻪ ﺿﻠﺖ ﺻﺎﻓﻨﻪ ﻋﻠﻰ ﺍﻟﻔﻠﻮﺱ ..

ﻭﻓﺮﺣﺎﻧﻪ ..

ﻳﺎﺑﺎ ﻫﺎﻱ ﺍﻟﻔﻠﻮﺱ ﺗﺨﻠﻴﻬﻢ ﻭﻱ ﻓﻠﻮﺱ ﻫﺬﺍ ﺍﻟﺒﻴﺖ ﻻﻥ ﺣﺘﺒﻴﻌﻪ ﺍﺷﺘﺮﻳﻠﻚ ﺑﻴﺖ ﺑﻐﺪﺍﺩ ﻭﺃﺟﺮﻩ ﻭﻋﻴﺶ ﻣﻨﻪ ﻭﻱ ﺍﻟﺘﻘﺎﻋﺪ ﻣﺎﻟﺘﻚ ﻭﺍﻛﻌﺪ ﺑﻴﺘﻲ ﻛﺎﻓﻲ ﻳﺎﺑﺎ ﺍﻧﺖ ﺗﻌﺒﺖ ﻭﻋﻨﺪﻙ ٤ﺑﻨﺎﺕ ..

ﻧﺎﺩﻳﻪ ﺿﻠﺖ ﺻﺎﻓﻨﻪ ﻋﻠﻴﻪ ﻣﻌﻘﻮﻟﻪ ﻫﻴﺞ ﺍﺟﺎﺯﻳﻬﺎ ﺑﻌﺪ ﺍﻟﻲ ﺳﻮﺗﻪ ﺑﻴﻪ ..

ﻛﺎﻣﺖ ﺗﺒﺠﻲ ﻭﺣﻈﻨﺘﻨﻲ ﻟﺞ ﻫﺒﻪ ﺍﻧﺘﻲ ﺷﺎﻳﻠﻪ ﻫﻢ ﺍﺑﻮﺝ ﻭﻫﻢ ﺑﻨﺎﺗﻲ ﻫﻢ ..

ﻧﺼﻴﺖ ﺻﻮﺗﻲ .. ﺑﺲ ﻣﻦ ﻧﻜﻌﺪ ﺑﺬﺍﻙ ﺍﻟﺒﻴﺖ ﻣﺎﺭﻳﺪ ﻳﺼﻴﺮ ﺷﻲ ﺑﻌﺪ ﻧﺎﺩﻳﻪ ﺍﻧﺘﻲ ﻛﺒﺮﺗﻲ ..

ﺍﻧﺪﻛﺖ ﺍﻟﺒﺎﺏ ﺑﻘﻮﺓ ..

ﻓﺰﻳﺖ ﻣﻦ ﻣﻜﺎﻧﻲ ﻭﻧﻄﻴﺖ ﺍﻟﻔﻠﻮﺱ ﻭﺍﻟﺠﻨﻄﻪ ﻣﺎﻟﺘﻲ ﻟﻨﺎﺩﻳﻪ .. ﺿﻤﻴﻬﻢ ﺑﺴﺮﻋﻪ ..

ﻭﺍﺳﻤﻊ ﺻﻮﺕ ﻳﺼﻴﺢ ..

ﺭﺣﻴﻢ ﺍﻓﺘﺢ ﺍﻟﺒﺎﺏ ﺍﻟﻴﻮﻡ ﺍﺣﺮﻙ ﺍﻟﺒﻴﺖ ﻋﻠﻴﻜﻢ ..

ﻓﺘﺢ ﺍﻟﺒﺎﺏ ﺍﺑﻮﻳﻪ ﻭﺷﻔﺖ ﻋﻠﻲ ﺷﺎﻳﻞ ﻋﺼﺎ ﺍﻭ ﻭﺍﻛﻒ .. ﻭﻳﻨﻬﺎ ﺑﺘﻚ ﺍﻟﻚ .... ﻩ ﺍﻟﻴﻮﻡ ﺍﻣﻮﺗﻬﺎ ﻭﺍﻛﺴﺮﻫﺎ ﻣﺜﻞ ﻣﺎﻛﺴﻯﺮﺗﻬﺎ ﻻﻣﻲ .. ﺍﺑﻮﻳﻪ ﻟﺰﻣﻪ ﺑﻘﻮﺓ ﻭﺻﺎﺡ ﻟﻚ ﻋﻠﻲ ﺍﻟﻤﻦ ﺗﺮﻳﺪ ﺗﻀﺮﺏ ..

ﻧﺎﺩﻳﻪ ﻟﺒﺴﺖ ﻋﺒﺎﺗﻬﺎ ﻭﻓﺎﺗﺖ ﻣﻦ ﺑﻴﻨﺎﺗﻬﻢ ﻭﻃﻠﻌﺖ ﺗﺼﻴﺢ ﺑﺎﻟﺸﺎﺭﻉ ﺍﻟﺤﻜﻮﻧﺎ ﻳﺎﺍﻫﻞ ﺍﻟﺮﺣﻢ ﻛﺘﻠﻮﺍ ﺭﺟﻠﻲ ... ﺍﻟﺤﻜﻮﻧﺎ ﺩﺧﻴﻠﻜﻢ

..... 

ﻋﻤﺎﺭ ..

ﺍﻟﻄﺒﻴﺐ ..

ﻋﻤﺎﺭ ﻋﻤﻠﻴﺘﻚ ﻧﺠﺤﺖ ﻭﺍﻟﺤﻤﺪﻟﻠﻪ ﺭﺟﻠﻚ ﻣﺘﺤﺴﻨﻪ ﻭﺗﻜﺪﺭ ﺗﻤﺸﻲ ﻋﻠﻴﻬﺎ ﺑﺪﻭﻥ ﻋﻜﺎﺯ ﺑﺲ ﺍﻛﻴﺪ ﻣﻮ ﻫﺴﻪ ﻭﺍﻧﺖ ﺍﻟﻈﺎﻫﺮ ﻣﺎﻣﺘﻌﺐ ﻧﻔﺴﻚ ..

ﺿﺤﻜﺖ .. ﺩﻛﺘﻮﺭ ﻭﺍﻟﻠﻪ ﻣﺎﻣﺮﺗﺎﺡ ﺑﺲ ﺍﻟﻮﺍﻟﺪﺓ ﺍﻟﻠﻪ ﻳﻨﻄﻴﻬﺎ ﺍﻟﻌﺎﻓﻴﻪ ﺗﺪﻋﻲ ﻭﺗﻘﺮﺍ ﻋﻠﻴﻬﺎ ..

ﻛﻠﻨﺎ ﻣﺎﺷﻴﻦ ﺑﺪﻋﻮﺍﺗﻬﻢ ﻫﻤﺎ ﺍﻟﺨﻴﺮ ﻭﺍﻟﺒﺮﻛﻪ ..

ﻃﻠﻌﺖ ﻣﻦ ﻳﻢ ﺍﻟﻄﺒﻴﺐ ﻭﻳﺎﻱ ﻣﺮﻳﻢ ﺻﺎﺭﺕ ﺍﻟﻲ ﺍﺧﺖ ﻭﺣﺒﻴﺒﻪ ﻭﺻﺪﻳﻘﻪ ﺟﻨﺖ ﺍﺗﺎﻟﻢ ﻻﻥ ﻣﺎﺗﺰﻭﺟﺖ ﻟﺴﻪ ﻋﻠﻤﻮﺩ ﺍﻣﻲ ﻣﺘﻜﺪﺭ ﺗﻌﻮﻓﻬﺎ .. ﺣﻤﺪﺕ ﺍﻟﻠﻪ ﻣﺎﺗﺰﻭﺟﺘﻬﺎ ﻻﺯﻝ ﺟﺎﻥ ﺫﻟﺘﻬﺎ ﻻﻣﻲ ﺭﺟﻌﺖ ﻟﻠﺒﻴﺖ ﻓﺮﺣﺎﻥ ﻭﺟﻨﺖ ﻣﺮﺍﺕ ﺍﻣﺸﻲ ﺑﺪﻭﻥ ﻋﻜﺎﺯ ﺑﺲ ﺍﻣﻲ ﺗﺤﻠﻔﻨﻲ ﺗﻜﻮﻟﻲ ﺟﺮﺣﻚ ﺍﺧﻀﺮ ﻣﻮ ﺯﻳﻦ ﻋﻠﻴﻚ ﺟﻨﺎ ﻧﻀﺤﻚ ﻋﻠﻰ ﺳﻮﺍﻟﻔﻬﺎ ﺍﻧﻲ ﻭﻣﺮﻳﻢ ..

ﺟﻨﺖ ﻧﺎﻳﻢ ﻣﻦ ﺍﻟﺘﻌﺐ ... ﻭﺷﻔﺖ ﺑﻤﻨﺎﻣﻲ ﺣﻠﻢ ﻏﺮﻳﺐ ﺷﻔﺖ ﻫﺒﺔ ﺑﻴﻨﻲ ﻭﺑﻴﻨﻬﺎ ﺣﺎﺟﺰ ﺑﺲ ﻣﺎﻛﻮ ﺣﺎﺟﺰ ﻳﻨﺸﺎﻑ ﺷﻲ ﺷﻔﺎﻑ ﺍﻣﺸﻲ ﺍﺭﻳﺪ ﺍﻭﺻﻠﻬﺎ ﺑﻌﻴﺪﻩ ﺑﻌﺪﻳﻦ ﻭﺻﻠﺖ ﺍﻟﻬﺎ ﺑﺎﻋﺠﻮﺑﻪ ﺑﺎﻭﻋﺖ ﺭﺟﻠﻲ ﺗﻮﺟﻌﻨﻲ ﻣﻦ ﻭﺻﻠﺖ ﺍﻟﻬﺎ ﺗﻌﺒﺖ ﻭﺍﻗﺘﺮﺑﺖ ﺍﻟﻬﺎ ﻟﻤﺴﺘﻬﺎ ﻣﺠﻨﺖ ﻣﺼﺪﻙ ﻭﺻﻠﺖ ...

ﺟﺎﻥ ﺍﻓﺰ ﺩﮒ ﺗﻠﻔﻮﻧﻲ .. ﺑﺎﻭﻋﺖ ﺟﺎﻧﺖ ﺍﻟﺴﺎﻋﻪ ٣ﺍﻟﻌﺼﺮ ﺗﻘﺮﻳﺒﺎ ..

ﺟﺎﻭﺑﺖ .. ﺍﻟﻮﻭﻭﻭ

ﺍﻟﺴﻼﻡ ﻋﻠﻴﻜﻢ ..

ﺍﻫﻼ ﻣﻨﻮ ﻭﻳﺎﻱ ..

ﺍﻧﻲ ﻣﺤﻤﺪ ﺍﺑﻦ ﺍﻟﺸﻴﺦ ...

ﻛﻠﺖ ﺑﺨﺎﻃﺮﻱ ﺍﻟﺸﻴﺦ ﺍﻟﻲ ﻳﻢ ﺑﻴﺖ ﺍﻫﻞ ﻫﺒﻪ ...

ﺍﻫﻼ ﻭﺳﻬﻼ ﺑﻴﻚ ﺟﻨﺖ ﻧﺎﻳﻢ ﻣﻤﻨﺘﺒﻪ ﻋﻠﻰ ﺍﻟﺮﻗﻢ ...

ﺍﺑﻮﻱ ﻳﺴﻠﻢ ﻋﻠﻴﻚ ﻭﻳﺮﻳﺪﻙ ﺗﺠﻲ ﺍﻟﻴﻮﻡ ﻧﻨﺘﻈﺮﻙ ﻋﻠﻰ ﺍﻟﻌﺸﻪ ..

ﺍﻥ ﺷﺎﺀﺍﻟﻠﻪ ﺳﺎﻋﻪ ﻭﺟﺎﻱ ﻣﺴﺎﻓﻪ ﺍﻟﻄﺮﻳﻖ ..

ﻧﻬﻴﺖ ﺍﻟﻤﻜﺎﻟﻤﻪ ﺑﺼﺮﺍﺣﻪ ﻓﺮﺣﺖ ﻋﻠﻰ ﺍﻻﻗﻞ ﺍﻓﻮﺕ ﻣﻦ ﻳﻢ ﺑﻴﺘﻬﻢ ﺍﺭﺗﺎﺡ ﺍﺣﺲ ﺑﻴﻬﺎ ﻗﺮﻳﺒﻪ ..

ﺑﺪﻟﺖ ﻭﻃﻠﻌﺖ ﻟﺒﺴﺖ ﻣﻼﺑﺲ ﺍﻟﺸﻐﻞ

ﻭﻧﺰﻟﺖ ﺷﻔﺖ ﺍﻣﻲ ﻛﺪﺍﻣﻲ ..

ﺍﻣﻲ ﺍﺩﻋﻴﻠﻲ .. ﺍﺩﻋﻴﻠﻲ ﺗﺘﺤﻘﻖ ﺍﻣﻨﻴﺘﻲ

ﺍﻥ ﺷﺎﺀﺍﻟﻠﻪ ﻭﻟﻴﺪﻱ ..

ﻣﺮﻳﻢ ... ﻭﻳﻦ ﺭﺍﻳﺢ ..

ﺭﺍﻳﺢ ﻟﻠﺸﻴﺦ ..

ﺑﺎﻟﺴﻼﻣﻪ ﺣﺒﻴﻴﻲ ..

ﺻﻌﺪﺕ ﺑﺎﻟﺴﻴﺎﺭﺓ ﻭﺍﻟﻌﻜﺎﺯ ﻭﻳﺎﻱ ﺣﺴﻴﺖ ﺭﻭﺣﻲ ﻣﺮﺗﺎﺡ ﻭﺍﻟﺪﻧﻴﺎ ﻣﺴﺎﻳﻌﺘﻨﻲ ﻣﺠﻨﺖ ﺍﻋﺮﻑ ﻟﻴﺶ ﺑﺲ ﻓﺴﺮﺗﻬﺎ ﻻﻥ ﻗﺮﻳﺐ ﺑﻴﺖ ﺍﻟﺸﻴﺦ ﻋﻠﻰ ﺍﻫﻠﻬﺎ ﻣﻊ ﺍﻟﻌﻠﻢ ﺍﻧﻲ ﺍﻋﺮﻑ ﻫﻲ ﻣﺘﺰﻭﺭ ﺍﻫﻠﻬﺎ ﻭﻋﻼﻗﺘﻬﺎ ﺗﻠﻒ ﺑﻤﺮﺕ ﺍﺑﻮﻫﺎ ..

ﻣﺸﻴﺖ ﺑﺴﻴﺎﺭﺗﻲ ﻭﺍﻧﻲ ﺍﺳﻤﻊ ﺍﻏﺎﻧﻲ ﻭﺍﺩﻧﺪﻥ ﻓﺘﺖ ﻣﻦ ﻳﻢ ﺑﻴﺘﻬﻢ ﺑﺎﺑﻬﻢ ﻣﺴﺪﻭﺩﻩ ..

ﻫﻨﺎ ﺟﺎﻧﺖ ﻫﺒﻪ ﺗﻠﻌﺐ ﺑﺎﺏ ﺍﻟﺤﻮﺵ ﻫﻨﺎ ﻛﻈﺖ ﻃﻔﻮﻟﺘﻬﺎ ﻭﺗﺨﻴﻠﺖ ﺑﻴﺒﻴﺘﻬﺎ ﺑﺎﻟﺒﺎﺏ ﻛﺎﻋﺪﺓ ﻭﻫﻲ ﺗﻠﻌﺐ ﺍﻧﺤﺮﻣﺖ ﻣﻦ ﺍﻻﻡ ﻭﻫﻲ ﺑﻌﺎﺯﺗﻬﺎ ﺍﻛﺜﺮ ﻣﻦ ﺍﻱ ﻭﻗﺖ .. ﻋﺴﻰ ﺃﻥ ﺗﻜﻮﻥ ﻣﺮﺗﺎﺣﻪ ﺑﺰﻭﺍﺟﻬﺎ .. ﻭﻟﻮ ﻋﻠﻲ ﻣﺘﻌﺐ ﻭﻣﻴﺨﺎﻑ ﺍﻟﻠﻪ ..

ﻭﺻﻠﺖ ﺑﺎﺏ ﺑﻴﺖ ﺍﻟﺸﻴﺦ ﺍﻟﻜﻞ ﺍﺳﺘﻘﺒﻠﻨﻲ ﻧﺰﻟﺖ ﺍﻭ ﻭﻳﺎﻱ ﻋﻜﺎﺯﺗﻲ ﻭﺍﻧﻲ ﺍﺳﻠﻢ ﻋﻠﻴﻬﻢ ﻓﺎﺗﺖ ﺗﻜﺴﻲ ﻣﻦ ﻳﻤﻲ ﻟﻤﺤﺖ ﺑﻨﻴﻪ ﻛﺎﻋﺪﺓ ﻣﻜﺪﺭﺕ ﺍﺑﺎﻭﻉ ﺑﺼﻮﺭﺓ ﻣﺴﺘﻤﺮﺓ ﻣﺎﺍﺭﻳﺪ ﻳﻜﻮﻟﻮﻥ ﺍﺑﺎﻭﻉ ﻋﻠﻰ ﺑﻨﺎﺗﻬﻢ ﻭﺑﻴﻨﺎ ﺯﺍﺩ ﻭﻣﻠﺢ ..

ﺿﻠﻴﺖ ﻭﺍﻛﻒ ﻭﺍﺳﻠﻢ ﺑﺎﻭﻋﺖ ﻋﻠﻰ ﺍﻟﺘﻜﺴﻲ ﻣﺎﻭﺻﻞ ﻟﺒﻴﺘﻬﻢ ﻭﻛﻒ ﻗﺒﻠﻬﺎ ﻭﺭﺟﻊ ..

ﻛﻠﺖ ﻭﻱ ﻧﻔﺴﻲ ﻋﻤﺎﺭ ﺷﺒﻴﻚ ﺍﻟﻴﻮﻡ ﻛﻤﺖ ﺗﺘﻮﻫﻢ ﺣﺘﻰ ﺑﻮﺟﻪ ﻫﺒﻪ ﻛﻤﺖ ﺗﺸﻮﻑ ﺍﻱ ﺑﻨﻴﻪ ﺑﺪﻳﺮﺗﻬﻢ ﻫﺒﻪ ..

ﻃﺒﻴﺖ ﻟﺒﻴﺖ ﺍﻟﺸﻴﺦ ﻭﺍﺧﺬﻭﺍ ﻣﻨﻲ ﻋﻜﺎﺯﺗﻲ ﻣﻦ ﻛﻌﺪﺕ ..

ﺍﻟﺸﻴﺦ ﻋﺎﺗﺒﻨﻲ .. ﻣﻦ ﻋﺮﻑ ﻣﺴﻮﻱ ﻋﻤﻠﻴﻪ ﻭﻣﺎﻳﺪﺭﻱ ﺳﺎﻣﻊ ﻣﻦ ﺍﻟﻨﺎﺱ ﺟﺎﻥ ﻣﺎﻛﻮ ﺷﻲ ﻳﻨﻈﻢ ﻋﻠﻰ ﺍﻟﺸﻴﺦ ﺑﺤﻜﻢ ﻣﻌﺎﺭﻓﻪ ﻭﺍﻟﻨﺎﺱ ﻛﻠﻬﺎ ﺗﺤﺒﻪ ..

ﺍﺳﺘﻘﺒﻠﻮﻧﻲ ﺍﺣﻠﻰ ﺍﺳﺘﻘﺒﺎﻝ ﻭﺷﺮﺑﻨﺎ ﻳﻤﻬﻢ ﺍﻟﺠﺎﻱ ﻭﺍﻟﮕﻬﻮﺓ .. ﻭﺍﺣﻨﺎ ﺩﻧﺤﺠﻲ ﻭﻧﻀﺤﻚ .. ﻃﺐ ﻭﺍﺣﺪ ﻣﻦ ﺍﻟﺼﺒﻴﺎﻥ ﺍﻟﻲ ﻳﻢ ﺍﻟﺸﻴﺦ .. ﻋﻤﻲ .. ﻋﻤﻲ ..

ﻛﻮﻝ ﺷﺒﻴﻚ ..

ﻫﺬﺍ ﻛﻌﺪ ﺑﺎﻟﻜﺎﻉ ﻭﻛﺎﻝ .. ﻣﺮﺕ ﺭﺣﻴﻢ ﺗﺼﻴﺢ ﻭﺗﺴﺘﻐﻴﺚ ﻭﺗﺼﻴﺢ ﺩﺧﻴﻠﻜﻢ ..

ﺻﺎﺡ ﺍﻟﺸﻴﺦ ﻻﺑﻨﻪ .. ﻭﻟﻚ ﺍﺭﻛﺾ ﺣﺎﻣﻲ ﺍﻟﻤﺮﺓ ...

ﻣﻦ ﺳﻤﻌﺖ ﻣﺮﺕ ﺭﺣﻴﻢ ﻋﺮﻓﺖ ﺍﺑﻮﻫﺎ ﻟﻬﺒﻪ .. ﻭﺑﺪﻭﻥ ﺷﻌﻮﺭ ﻭﺍﻧﻲ ﺭﺟﻠﻲ ﻣﻠﻔﻮﻓﻪ ﻭﺍﻟﻌﻤﻠﻴﻪ ﺑﻌﺪﻫﺎ ﻓﺰﻳﺖ ﻭﺳﺤﺒﺖ ﺳﻼﺡ ﻭﺭﺣﺖ ﺍﺭﻛﺾ ﻟﻜﻴﺖ ﻧﺎﺩﻳﻪ ﺗﺼﺮﺥ ..

ﻃﺒﻴﺖ ﺷﻔﺖ ﺍﻟﻲ ﺟﻨﺖ ﺩﺍﻧﺘﻈﺮﻩ ﻫﺒﻪ ﻛﺪﺍﻣﻲ ﺍﻱ ﻫﻴﻪ ﺻﺎﻳﺮﻩ ﺑﻴﻦ ﺍﺑﻮﻫﺎ ﻭﺑﻴﻦ ﺭﺟﻠﻬﺎ ﺭﺟﻠﻬﺎ ﺍﻟﻲ ﺷﺎﻳﻞ ﻋﺼﺎ ﻭﻳﺮﻳﺪ ﻳﻀﺮﺑﻬﺎ ﻫﻲ ﻭﺍﺑﻮﻫﺎ ﺳﺤﺒﺘﻪ ﻣﻦ ﻳﺎﺧﻪ ﻗﻤﻴﺼﻪ ﻋﻠﻴﻪ ﻭﺿﺮﺑﺘﻪ ﺑﻮﻛﺲ ﻋﻠﻰ ﻭﺟﻬﻪ ﺭﺟﻊ ﺩﻳﻀﺮﺑﻨﻲ ﺿﺮﺑﺘﻪ ﺑﺎﻻﺧﻤﺲ ﻋﻠﻰ ﺭﺃﺳﻪ ﺃﻭ ﻭﻛﻊ ﺑﺎﻟﻜﺎﻉ ...

ﺍﻟﺘﻔﺘﺖ ﻋﻠﻴﻬﺎ .. ﻟﻜﻴﺘﻬﺎ ﺗﻤﺴﺢ ﺑﻮﺟﻪ ﺍﺑﻮﻫﺎ ﺟﺎﺑﺘﻠﻪ ﻣﻲ ﻭﻏﺴﻠﺖ ﻭﺟﻬﻪ ﻭﻫﻲ ﺗﻬﻔﻲ ﺍﻟﻪ ﻭﺍﻧﻲ ﺻﺎﻓﻦ ﻋﻠﻴﻬﺎ ﻭﺍﻟﺒﻴﺖ ﻛﻠﻪ ﻧﺎﺱ ﻭﻫﻴﻪ ﻣﺎﺷﺎﻓﺘﻨﻲ ﺗﺒﺠﻲ ﻭﺗﻜﻮﻝ ..

ﻫﺎ ﻳﺎﺑﺎ ﺷﻠﻮﻥ ﺻﺮﺕ ﺧﻤﺎ ﺍﺗﺎﺫﻳﺖ ﻫﺬﺍ ﺍﻟﺤﻘﻴﺮ ﺿﺮﺑﻚ ﻳﺎﺑﺎﺑﺎ ﺳﻮﺩﻩ ﻋﻠﻴﻪ ﻭﻫﻲ ﺗﺒﻮﺱ ﺑﺎﻳﺪﻩ .. ﺍﻟﺘﻔﺖ ﻋﻠﻴﻪ ﻭﻫﻲ ﺗﺮﻳﺪ ﺗﺸﻜﺮ ﻣﻨﻲ ..

ﻣﻨﻴﻦ ﺍﺟﻴﺖ .......... ﺿﻠﺖ ﺗﺒﺎﻭﻉ ﻋﻠﻴﻪ ﻭﻛﺎﻣﺖ ﺗﻔﺮﻙ ﺑﻌﻴﻮﻧﻬﺎ ...

ﻛﻤﻠﺖ ﻛﻼﻣﻬﺎ ﻣﺎﺗﺮﻳﺪ ﺍﺣﺪ ﻳﻨﺘﺒﻪ ﻋﻠﻴﻬﺎ ﺑﺲ ﻛﺎﻧﺖ ﻣﺘﻌﺮﻑ ﺗﺤﺠﻲ ..

ﺻﺤﺖ ﻋﻠﻰ ﺍﻟﻮﻟﺪ ﺍﻟﻤﻮﺟﻮﺩﻳﻦ ..

ﺷﻴﻠﻮﺍ ﻫﺬﺍ ﺍﺭﺑﻄﻮﻩ ﻭﺧﻠﻮﻩ ﺑﺴﻴﺎﺭﺗﻲ ...

ﺑﺎﻭﻋﺖ ﻋﻠﻴﻬﺎ ..

ﺷﻨﻮ ﺍﺳﻤﺞ ..

ﻩ ﻩ ﻫﺒﺒﺒﻪ ... ﺍﺳﻤﻲ ﻫﺒﻪ ...

ﺍﻣﺸﻲ ﻭﻳﺎﻱ ﺍﻧﺘﻲ ﻭﺍﻟﻮﺍﻟﺪ ﺣﺘﻰ ﻧﺎﺧﺬ ﺍﻗﻮﺍﻟﻜﻢ ...

ﺑﺲ ﻫﻮ ﺯﻭﺟﻲ ...

ﺑﺎﻭﻋﺖ ﻋﻠﻴﻬﺎ ...

ﻛﻮﻣﻲ ﺟﻴﺒﻲ ﺍﻟﻮﺍﻟﺪ ﻭﺗﻌﺎﻱ ﻭﻳﺎﻱ ..

ﺑﺎﻭﻋﺖ ﻋﻠﻰ ﺍﺑﻮﻫﺎ .. ﺣﺠﻲ ﺗﺠﻲ ﻭﻳﺎﻧﺎ ﻟﻮ ﺍﻧﺘﻈﺮﻙ ﺳﺎﻋﻪ ﺗﺮﺗﺎﺡ ...

ﻻ ﻳﺎﺑﺎ ﺍﺟﻲ ﻭﻳﺎﻙ ..

ﺍﻟﺸﻴﺦ ﺍﺟﺎ ﻋﻠﻴﻪ ﻭﻛﺎﻝ ..

ﻋﻤﺎﺭ ﻭﻟﻴﺪﻱ ﻫﻤﺎ ﻋﻴﺎﻝ ﺑﻴﺖ ﻟﻴﺶ ﻣﺎﻧﻔﺾ ﺍﻟﻤﻮﺿﻮﻉ ﻫﺴﻪ ..

ﺷﻴﺨﻨﺎ ﺍﻟﻲ ﺗﻜﻮﻟﻪ ﺍﻧﺖ ﺍﻣﺮ .. ﻟﻜﻦ ﻣﺪ ﺍﻳﺪﻩ ﻋﻠﻴﻪ ﺇﺫﺍ ﺗﻘﺒﻠﻬﺎ ﻫﺴﻪ ﺍﺗﺮﻛﻪ ﻟﺤﺎﻝ ﺳﺒﻴﻠﻪ ..

ﺳﻜﺖ ﻣﺎﺣﺠﻰ ﺷﻲ ﻭﻛﺎﻝ ﺍﻟﺮﺍﻱ ﺭﺍﻳﻚ ...

ﺻﻌﺪﺕ ﻫﺒﻪ ﻭﺍﺑﻮﻫﺎ ... ﻭﺳﻴﺎﺭﻩ ﻭﺭﺍﻳﻪ ﺑﻴﻬﺎ ﻋﻠﻲ ..

ﺍﻭﻝ ﻣﺎﻭﺻﻠﻨﺎ ﺍﻟﻤﺮﻛﺰ ..

ﻛﺘﻠﻬﻢ ﺷﻤﺮﻭﻩ ﺑﺎﻟﺴﺠﻦ ...

ﻃﺐ ﺍﺑﻮﻫﺎ ﻟﻬﺒﻪ ﻭﻫﻲ ﺻﺎﻓﻨﻪ ﻋﻠﻴﻪ ﻣﺘﻌﺮﻑ ﺷﻨﻮ ﺍﻟﻤﻮﺿﻮﻉ ﻭﺷﻠﻮﻥ ﺍﺟﻴﺖ ..

ﺣﺠﻲ ﺍﺣﺠﻴﻠﻲ ﻫﺬﺍ ﻣﻨﻮ ﻭﻟﻴﺶ ﻫﻴﺞ ﺍﺗﻌﺪﻯ ﻋﻠﻴﻚ ..

ﻛﺎﻟﺖ ﻫﺒﻪ ﻫﺬﺍ ﺯﻭﺟﻲ ﻭﺑﺪﺕ ﺗﺤﺠﻲ ﻭﺗﺒﺠﻲ ..

ﺍﺭﺟﻮﺝ ﻻﺗﺒﺠﻴﻦ ..

ﻳﻌﻨﻲ ﺍﻧﺘﻲ ﺭﺩﺗﻲ ﺍﻟﻄﻼﻙ ﻭﻫﻮ ﻣﺎﻗﺒﻞ ..

ﺍﻱ ..

ﺩﻛﻴﺖ ﺍﻟﺠﺮﺱ ..

ﺟﻴﺒﻮﻟﻲ ﻫﺬﺍ ﻋﻠﻲ ﻭﺍﺫﺍ ﺑﻌﺪﻩ ﻓﺎﻗﺪ ﺻﺤﺼﺤﻮﻩ ﻭﺟﻴﺒﻮﻩ ﻛﺪﺍﻣﻲ ..

ﻭﺭﺓ ﺍﺷﻮﻳﻪ ﺟﺎﺑﻮﻩ ﻛﺪﺍﻣﻲ ..

ﺍﺳﻤﻚ ..

ﻋﻠﻲ ﺳﻌﺪﻭﻥ ..

ﻟﻴﺶ ﺗﻌﺪﻳﺖ ﻋﻠﻰ ﺍﻟﻨﺎﺱ ﻭﺗﻬﺠﻤﺖ ﻋﻠﻴﻬﻢ ﻭﺗﻮﺟﻬﺖ ﻋﻠﻴﻬﻢ ﺑﺎﻟﺴﺐ ﻭﺍﻟﻘﺬﻑ ...

ﺳﻴﺪﻱ ﻣﺪﺕ ﺍﻳﺪﻫﺎ ﻋﻠﻰ ﺍﻣﻲ ..

ﻭﺗﻜﻮﻡ ﺗﻀﺮﺏ ﺍﺑﻮﻫﺎ ...

ﻭﺗﺠﺎﻭﺯ ﻭﺗﺤﺎﻭﻝ ﺗﻤﺪ ﺍﻳﺪﻙ ﻋﻠﻴﻪ .. . ﺍﻟﻘﻀﻴﻪ ﺍﻻﻭﻟﻰ ﻋﺮﻓﺘﻬﺎ ﻭﺍﻟﺜﺎﻧﻴﻪ ﺗﻌﺪﻱ ﻋﻠﻰ ﺍﻟﻈﺎﺑﻂ ﺃﺛﻨﺎﺀ ﺗﺄﺩﻳﺘﻪ ﻭﺍﺟﺒﻪ ..

ﺳﻴﺪﻱ ﻣﺎﺟﻨﺖ ﺍﻋﺮﻑ ﺑﻴﻚ ﺿﺎﺑﻂ ...

ﻣﺸﻜﻠﺘﻚ ﻣﻮ ﻣﺸﻜﻠﺘﻲ ..

ﺳﻴﺪﻱ ﻭﺍﻟﻠﻪ ﻣﺎﻋﺮﻑ ﺑﻴﻚ

ﺍﺳﻤﻊ ﻟﻚ .. ﻃﻠﮓ

ﺷﻨﻮﻭﻭﻭ

ﻃﻠﮓ ....

ﺿﻞ ﺻﺎﻓﻦ ﻋﻠﻴﻪ ﻭﺍﺑﻮﻫﺎ ﻫﻢ ﺻﻔﻦ ﻋﻠﻴﻪ ...

ﻛﺘﻠﻚ ﻃﻠﮓ ﻫﺴﻪ ﻛﺪﺍﻣﻲ ﺍﻧﺖ ﻣﻮ ﻣﺎﻋﻨﺪﻙ ﻣﺎﻧﻊ ﺗﻄﻠﮓ ﻣﻘﺎﺑﻞ ﻓﻠﻮﺱ ﻳﺎﻟﻪ ﻃﻠﮓ .. ﻭﻛﺪﺍﻣﻲ ﻭﻛﺪﺍﻡ ﺍﺑﻮﻫﺎ ..

ﻛﺎﻝ .. ﻫﺒﻪ ﺍﻧﺘﻲ ﻃﺎﻟﮓ ...

ﺩﻛﻴﺖ ﺍﻟﺠﺮﺱ ﺻﺤﺖ ﻋﻠﻴﻬﻢ ﺃﺧﺬﻭﻩ .. ﻭﻋﺸﻮﻩ .. ﻭﺍﺷﺮﺕ ﺍﻟﻬﻢ .. ﻳﻌﻨﻲ ﺍﺑﺴﻄﻮﻩ ..

ﺣﺠﻲ ﻳﻌﻨﻲ ﻣﺼﺮ ﺍﻧﺖ ﻣﺎ ﺗﻘﻴﻢ ﺩﻋﻮﻯ ..

ﻻ ﺍﺑﻨﻲ ﺷﻤﻬﻤﺎ ﻳﻜﻮﻥ ﻫﻮ ﺍﺑﻦ ﺳﻌﺪﻭﻥ ..

ﻃﻮﻝ ﻣﺎﺍﺣﺠﻲ ﻫﺒﻪ ﺗﺒﺎﻭﻉ ﻋﻠﻴﻪ ﻭﻣﻦ ﺍﺑﺎﻭﻉ ﻋﻠﻴﻬﺎ ﺗﺪﻳﺮ ﻭﺟﻬﻬﺎ ..

ﺗﻜﻮﻝ ﻭﻱ ﻧﻔﺴﻬﺎ ﻟﻴﺶ ﻳﺒﺎﻭﻉ ﻋﻠﻴﻪ ﻣﻮ ﻋﻨﺪﻩ ﺯﻭﺟﻪ .. ﺯﻳﻦ ﻫﺎﻱ ﺷﻮﻓﺘﻪ ﺻﺪﻓﻪ ﻭﻣﻌﺮﻓﺘﻪ ﺑﺎﻟﺸﻴﺦ ﺻﺪﻓﻪ ..

ﺭﺟﻌﻨﺎ ﻟﻠﺒﻴﺖ ﻭﺟﻨﺖ ﻛﻠﺶ ﺗﻌﺒﺎﻧﻪ ﻭﺻﺎﻓﻨﻪ ﺍﻟﻲ ﺻﺎﺭ ﻳﻤﻜﻦ ﺣﻠﻢ ﺍﺭﻳﺪ ﺍﺻﺤﻰ ﻣﻨﻪ ﺑﺲ ﻣﺎﺟﻨﺖ ﻓﺮﺣﺎﻧﻪ ﻻﻥ ﺍﺩﺭﻱ ﻋﻤﺎﺭ ﻣﺘﺰﻭﺝ ﻣﺎﺍﺭﻳﺪ ﺍﺧﺮﺏ ﻋﻠﻴﻪ ﺣﻴﺎﺗﻪ ﻣﺴﺘﺤﻴﻞ ﺍﻗﺒﻞ ﺍﻛﻮﻥ ﺯﻭﺟﻪ ﺛﺎﻧﻴﻪ ... ﻃﻮﻝ ﺍﻟﻄﺮﻳﻖ ﻭﻫﻮ ﻳﺒﺎﻭﻉ ﻋﻠﻴﻪ ﻣﻦ ﺍﻟﻤﺮﺍﻳﻪ ﻭﺍﻧﻲ ﺻﺎﺩﺓ ﻋﻨﻪ ..

... ﺍﺷﺒﻴﻬﺎ ﻫﺒﻪ ﻟﻴﺶ ﻫﻴﺞ ﻣﻔﺮﺣﺎﻧﻪ ﺗﻮﻗﻌﺘﻬﺎ ﺗﻔﺮﺡ ﺑﺸﻮﻓﺘﻲ ... ﻳﻤﻜﻦ ﺗﺤﺒﻪ ﻟﺰﻭﺟﻬﺎ ﻭﻛﺮﻫﺘﻨﻲ ﻻﻥ ﻃﻠﺒﺖ ﻣﻨﻪ ﻳﻄﻠﻜﻬﺎ ..

ﺑﺲ ﻫﻲ ﺍﻟﻲ ﻛﺎﻟﺖ .. ﻃﻠﺒﺖ ﺍﻟﻄﻼﮒ ﻣﻨﻪ ﻭﻣﻴﻘﺒﻞ ﻳﻄﻠﮕﻨﻲ ﺍﻻ ﺍﺩﻓﻌﻠﻪ ﻓﻠﻮﺱ .. ﻻﺯﻡ ﺍﺗﺎﻛﺪ ﺍﺫﺍ ﺗﺤﺒﻪ ﺧﻠﻲ ﺗﺮﺟﻊ ﺍﻟﻪ ﻣﺎﺍﻓﺮﺽ ﻧﻔﺴﻲ ﻋﻠﻴﻬﺎ ..

ﻭﺻﻠﺘﻬﻢ ﻟﺒﻴﺘﻬﻢ ﺟﺎﻧﺖ ﺍﻟﺪﻧﻴﺎ ﻇﻠﻤﻪ ﻃﺒﺒﺖ ﺍﺑﻮﻫﺎ ﺟﻮﺓ ﺑﻐﺮﻓﺘﻪ ﻭﻣﺎﺗﺮﻛﺘﻪ ﺍﻻ ﻧﺎﻡ ﻭﻧﺎﺩﻳﻪ ﻭﻳﺎﻩ ﻛﺘﻠﻬﺎ ﺍﺑﻘﻲ ﻳﻤﻪ ﻧﺎﺩﻳﻪ ﺟﺎﻧﺖ ﺗﺒﺎﻭﻉ ﻭﻣﻦ ﺷﺎﻓﺘﻨﻲ ﻋﺮﻓﺘﻨﻲ ﻭﺍﺗﺎﻛﺪﺕ ﺍﻧﻲ ﺍﺣﺒﻬﺎ ﻟﻬﺒﻪ ..

ﻃﻠﻌﺖ ﻣﻦ ﻏﺮﻓﻪ ﺍﺑﻮﻫﺎ ﻭﺟﺮﻳﺘﻬﺎ ﻋﻠﻴﻪ ..

ﺍﻧﺘﻲ ﻟﻴﺶ ﺿﺎﻳﺠﻪ ... ﺗﺮﻳﺪﻳﻦ ﺗﺒﻘﻴﻦ ﻭﻳﺎﻩ ﻛﻮﻟﻲ .. ﺻﺎﺭ ﺍﺷﻬﺮ ﺍﺩﻭﺭ ﻋﻠﻴﺞ ﺩﻛﻴﺖ ﻛﻞ ﺑﻴﺒﺎﻥ ﺍﻟﻨﺎﺱ ﺣﺘﻰ ﻳﻢ ﻣﻨﻄﻘﻪ ﺭﺟﻠﺞ ﺍﻟﺴﺎﻓﻞ ﺍﻧﻲ ﺍﺩﻭﺭ ﺑﺲ ﺳﻤﻌﺖ ﺑﺎﻟﻌﻄﻴﻔﻴﻪ ﺑﺲ ﻣﺎﺍﻋﺮﻑ ﻳﺎﺑﻴﺖ ﻳﺎﺷﺎﺭﻉ ﻳﺎﺩﺭﺑﻮﻧﻪ .. ﻃﻠﻌﺖ ﺩﻭﺭﻳﺎﺕ ﻭﺟﺒﺖ ﺍﻟﺤﺮﺱ ﻭﺍﺗﺤﻤﻠﺖ ﻣﺴﺆﻭﻟﻴﻪ ﺣﺘﻰ ﺑﺲ ﺍﻟﻜﺎﺝ ..

ﻭﻣﻦ ﻋﻔﺘﻨﻲ ﻭﺭﺣﺖ ﻛﺎﻟﺘﻬﺎ ﻭﻫﻴﻪ ﺗﺒﺠﻲ .. ﻣﻜﻠﺖ ﻭﻳﻦ ﺍﺭﻭﺡ ﻭﺗﺪﺭﻱ ﺑﻴﻪ ﻣﺎﻋﻨﺪﻱ ﻣﻜﺎﻥ ﻳﻠﻤﻨﻲ ﺿﻠﻴﺖ ﺍﻓﺘﺮ ﺑﺎﻟﺸﻮﺍﺭﻉ ﻭﺍﻟﺒﻴﻮﺕ ..

ﻏﺼﺒﻦ ﻣﺎﻋﻠﻴﻪ ﻣﺎﻛﺪﺭﺕ ﺍﺟﻲ ...

ﻣﺎﻛﻮ ﺷﻲ ﻏﺼﺒﻦ ﻣﺎﻋﻠﻴﻚ ..

ﻫﺒﻪ ﺍﻧﻲ ﺍﺣﺒﺞ ..

ﻭﻳﻨﻪ ﺣﺒﻚ ﻋﻤﺎﺭ ﻭﺍﻧﺖ ﺗﺨﻠﻴﺖ ﻋﻨﻲ ..

ﻟﺞ ﻫﺒﻪ ﺍﻧﻜﻠﺒﺖ ﺑﻴﻪ ﺍﻟﺴﻴﺎﺭﻩ ﻭﺻﻠﺖ ﻟﻠﻤﻮﺕ ﻭﻓﻘﺪﺕ ﺍﻟﻮﻋﻲ ﻭﻫﺎﻱ ﺭﺟﻠﻲ ﻛﺪﺍﻣﺞ ﺍﻧﻲ ﻭﻋﻜﺎﺯﺗﻲ ..

ﺯﻳﻦ ﺣﺎﺍﻗﺘﻨﻊ ﺑﻜﻼﻣﻚ ..

ﻭﺯﻭﺟﺘﻚ ..

ﺯﻭﺟﺘﻲ ﻣﻨﻮ ..

ﺍﺗﺼﻠﺖ ﺑﻴﻚ ﻣﻦ ﻣﺎﺍﺟﻴﺖ ﻋﻠﻴﻪ ﻃﻠﻌﺘﻠﻲ ﻭﺣﺪﺓ ﺗﻜﻮﻝ ﺍﻧﻲ ﺯﻭﺟﺘﻪ ﻭﻧﻬﺖ ﺍﻟﻤﻜﺎﻟﻤﻪ ..

ﺍﺻﻼ ... ﺍﺻﻼ ... ﺗﻠﻔﻮﻧﻲ ﺭﺍﺡ ﺑﺎﻟﺤﺎﺩﺙ ..

ﻟﺤﻈﻪ .... ﻟﺤﻈﻪ .... ﺍﻧﺘﻈﺮﻱ ﺭﺍﺡ ﺍﺳﻤﻌﺞ ﺻﻮﺗﻬﺎ ﻭﻛﻮﻟﻴﻠﻲ ﻫﻴﻪ ﻟﻮ ﻻ ..

ﺍﺗﺼﻠﺖ ﺑﺎﺯﻝ ﻭﺭﺩﺕ ﻋﻠﻴﻪ ﺍﺯﻝ ..

ﻫﻠﻮ ﻋﻤﺎﺭ ..

ﻫﻠﻮ ﺍﺯﻝ ..

ﺣﻄﺖ ﺍﺫﻧﻬﺎﻋﻠﻰ ﺍﻟﺘﻠﻔﻮﻥ ﺣﺘﻰ ﺗﺴﻤﻊ ..

ﻣﺸﺘﺎﻗﻪ ﺍﻟﻚ ﺣﺒﻴﺒﻲ ..

ﺍﺳﻤﻌﻲ ﺍﻟﻠﻲ ﺑﻴﻨﺎﺗﻨﺎ ﺍﻧﺘﻬﻰ ﻣﺎﺑﻴﻬﺎ ﺩﺍﻋﻲ ﻫﺎﻟﻜﻼﻡ ...

ﻋﻤﺎﺭ ﺑﺲ ﺍﻧﻄﻴﻨﻲ ...

ﻗﺎﻃﻌﺘﻬﺎ .. ﺍﻟﺘﻠﻔﻮﻥ ﻟﻴﺶ ﺗﻜﻮﻟﻴﻦ ﺿﺎﻉ ﻣﻦ ﻓﻘﺪﺗﻪ ﺑﺎﻟﺤﺎﺩﺙ ﻭﻫﻮ ﻋﻨﺪﺝ ..

ﻫﺎﺍﺍﺍ ... ﻣﻮ ﻳﻤﻲ ..

ﺍﺗﺼﻠﺖ ﻭﺣﺪﻩ ﻭﻛﺘﻴﻠﻬﺎ ﺍﻧﺘﻲ ﺯﻭﺟﺘﻲ ...

ﻳﻌﻨﻲ ﺍﺧﺬﺗﻲ ﺗﻠﻔﻮﻧﻲ ﻭﻛﺬﺑﺘﻲ ﻋﻠﻴﻪ ..

ﺍﻧﻲ ﻣﻮ ﻗﺼﺪﻱ ﺍﺧﺬﻩ .. ﺍﻧﻲ ﺟﻨﺖ ﺍﻏﺎﺭ ﻋﻠﻴﻚ ﻋﻤﺎﺭ ..

ﻭﻫﻲ ﺗﺤﺠﻲ ﻧﻬﻴﺖ ﺍﻟﻤﻜﺎﻟﻤﻪ ..

ﺻﻮﺗﻬﺎ ﻟﻮ ﻻ ...

ﺍﻱ ﺻﻮﺗﻬﺎ

ﺍﺗﺎﻛﺪﺗﻲ .....

ﻫﺒﻪ .. ﻳﻌﻨﻲ ﺍﻧﺖ ﻣﻤﺘﺰﻭﺝ ..

ﻻ ﻫﺒﻪ ﺟﻨﺖ ﺍﺩﻭﺭ ﻋﻠﻴﺞ ﻣﺘﺖ ﻣﻦ ﻣﺎﻟﻜﻴﺘﺞ ..

ﻭﻫﺎﻱ ﺍﺯﻝ ...

ﺍﺷﺸﺶ ﺍﺗﺮﻛﻲ ﻛﻠﺸﻲ ﻭﺭﺍﺝ .. ﺍﻟﻤﻬﻢ ﺍﺣﻨﺎ ﺳﻮﺓ .. ﻭﻧﺴﻴﺖ ﻧﻔﺴﻲ ﻭﺍﺧﺬﺗﻬﺎ ﻟﺤﻈﻨﻲ ﻭﺑﻮﺳﺘﻬﺎ ﻣﻦ ﺍﻳﺪﻫﺎ ..

ﻋﻤﺎﺭ ﻋﻔﻴﻪ ﻣﻴﺼﻴﺮ ﺍﻧﻲ ﻣﺘﺰﻭﺟﻪ ..

ﻧﺴﻴﺖ ﻭﺍﻟﻠﻪ ﻧﺴﻴﺖ ﻣﻦ ﻟﻬﻔﺘﻲ ﻭﺷﻮﮔﻲ ﻋﻠﻴﺞ ..

ﺳﻤﻌﺖ ﺻﻮﺕ ﻭﺭﺍﻳﻪ ﺑﺎﻭﻋﺖ ﻟﻜﻴﺖ ﺧﻮﺍﺗﻬﺎﻭﺍﻛﻔﺎﺕ ﻳﺒﺎﻭﻋﻮﻥ ﻋﻠﻴﻨﺎ ﻭﻳﻀﺤﻜﻮﻥ .. ﺿﺤﻜﺖ ﻋﻠﻴﻬﻢ ﻭﺷﺒﮕﺘﻬﻢ ﻣﻦ ﻓﺮﺣﺘﻲ ﻭﺍﺍﻟﻔﺮﺣﻪ ﻣﺎﺳﺎﻳﻌﺘﻨﻲ .. ﻃﻠﻌﺖ ﻣﻦ ﻳﻤﻬﺎ ﻭﺍﺧﺬﺕ ﺭﻗﻢ ﺗﻠﻔﻮﻧﻬﺎ ...

ﺭﺟﻌﺖ ﻟﻠﻤﺮﻛﺰ ... ﻛﺘﻠﻬﻢ ﺟﻴﺒﻮﻟﻲ ﻋﻠﻲ ﺍﺟﺎﻧﻲ ﻣﺪﻣﻰ ﻭﻣﺒﺴﻮﻁ .. ﺍﻭﻝ ﻣﺎﺍﺷﺎﻓﻨﻲ ﺳﻴﺪﻱ ﺍﺭﺟﻮﻙ ...

ﺍﺳﻤﻊ ﺭﺍﺡ ﺍﺧﻠﻲ ﺳﺒﻴﻠﻚ ﺑﺲ ﺑﺸﺮﻁ ﺗﻮﻗﻌﻠﻲ ﻫﺎﻱ ﺍﻟﻮﺭﻗﻪ ﻫﺎﻱ ﻋﺪﻡ ﺗﻌﺮﺽ ﺍﻟﻬﺎ ﻭﻻﻫﻠﻬﺎ ..

ﻭﺑﺎﺟﺮ ﺗﺮﻭﺡ ﺗﻄﻠﻜﻬﺎ ﻭﻣﻨﺮﻳﺪ ﻻﻣﻘﺪﻡ ﻭﻻ ﻣﺆﺧﺮ ..

ﺻﺎﺭ ﺳﻴﺪﻱ ..

ﻭﻟﻲ ﺭﻭﺡ ﻻﻫﻠﻚ ﻭﺑﻌﺪ ﻣﺎﺭﻳﺪ ﺍﺷﻮﻑ ﻭﺟﻬﻚ ﻛﺪﺍﻣﻲ ..

ﻃﻠﻊ ﻳﺮﻛﺾ ﻭﻣﻴﺒﺎﻭﻉ ﻭﺭﺍﻩ ...

ﺭﺟﻌﺖ ﻟﻠﺒﻴﺖ ﻓﺮﺣﺎﻥ ﺍﻭﻝ ﻣﺎﻃﺒﻴﺖ ﻟﻐﺮﻓﺘﻲ ﺿﻠﻴﺖ ﺍﺣﺠﻲ ﻭﻳﺎﻫﺎ ﻭﻃﻠﺒﺖ ﻣﻨﻲ ﺃﻥ ﺍﺗﺮﻛﻬﺎ ﻟﺤﻴﻦ ﻣﺎﺗﺨﻠﺺ ﺍﻟﻌﺪﺓ ... ﻣﺮﺕ ﺍﻟﻌﺪﺓ ﺛﻜﻴﻠﻪ ﻭﺍﻧﻲ ﺍﺣﻠﻢ ﻳﻮﻡ ﻳﻮﻡ ﺍﺷﻮﻓﻬﺎ ..

ﺍﻧﺘﻘﻠﻮﺍ ﻟﺒﻴﺘﻬﻢ ﺍﻟﺠﺪﻳﺪ ﺑﻴﺖ ﻫﺒﻪ ﺑﻌﺪ ﻣﺎﺑﺎﻋﻮﺍ ﺑﻴﺘﻬﻢ ﺍﻟﻘﺪﻳﻢ .. ﻧﺎﺩﻳﻪ ﺗﻐﻴﺮﺕ ﻭﺗﺎﺑﺖ ﻟﺮﺑﻬﺎ ﺣﺴﺖ ﺑﻘﻴﻤﻪ ﺭﺟﻠﻬﺎ ﻭﻗﻴﻤﻪ ﻫﺒﻪ ﻭﺑﻨﺎﺗﻬﺎ ﻭﻋﺎﺷﺖ ﻭﻳﺎﻫﻢ ﻧﻮﺭﻳﻪ ﺍﻟﻲ ﺟﺎﻧﺖ ﻣﺄﺟﺮﺓ ﺍﻟﺒﻴﺖ ﻣﻦ ﻫﺒﻪ .. ﻣﺎﺗﺨﻠﺖ ﻋﻨﻬﺎ ﻫﺒﻪ ﻭﺣﺴﺒﺘﻬﺎ ﻣﺜﻞ ﺍﻣﻬﺎ ...

ﻭﺍﻭﻝ ﻣﺎﻛﻤﻠﺖ ﺍﻟﻌﺪﺓ .. ﺭﺣﺖ ﺧﻄﺒﺘﻬﺎ ﻭﺻﺎﺭﺕ ﻫﻲ ﺧﻄﻮﺑﻪ ﻭﻫﻲ ﻋﻘﺪ ﻗﺮﺍﻥ ﺍﻣﻲ ﺟﺎﻧﺖ ﻓﺮﺣﺎﻧﻪ ﻭﻣﺮﻳﻢ ﻣﺮﺗﺎﺣﻪ ﺣﺴﻦ ﺑﻬﺒﻪ ﻫﺒﻪ ﺍﻻﻧﺴﺎﻧﻪ ﺍﻟﻮﺣﻴﺪﺓ ﺍﻟﻲ ﺣﺘﻘﻴﻢ ﺑﺎﻣﻲ ﻭﺗﺴﻌﺪﻧﻲ ... ﻭﺑﻴﻦ ﻣﺎﺟﺎﻧﺖ ﺍﻟﻨﺎﺱ ﺗﺘﻌﺸﻰ ﻭﻣﺨﺒﻮﺻﻴﻦ ﻭﺻﻮﺕ ﺍﻟﻐﻨﻰ ﻭﺍﻟﺮﻛﺺ ﺍﺧﺬﺗﻬﺎ ﺑﺎﻟﺤﺪﻳﻘﺔ ...

ﺍﺣﺒﺞ ﻫﺒﻪ ..

ﺍﺣﺒﻚ ﻋﻤﺎﺭ ..

ﺍﺧﺬﺗﻬﺎ ﺑﺤﻈﻨﻲ ﻭﺑﻮﺳﺘﻬﺎ ﺍﻭ ﻭﻋﺪﺗﻬﺎ ﻣﺎﺍﺗﺨﻠﻰ ﻋﻨﻬﺎ ..

ﺍﺗﺰﻭﺟﻨﺎ ﻭﺟﺎﻧﺖ ﻫﺒﻪ ﺍﺣﻠﻰ ﻋﺮﻭﺱ ﻭﺑﺎﻟﻌﺮﺱ ﻧﺎﺱ ﺷﺎﻓﻮﺍ ﻣﺮﻳﻢ ﻭﺧﻄﺒﻮﻫﺎ ﻭﺗﺰﻭﺟﺖ ﻣﺮﻳﻢ ﺑﻌﺪ ﺷﻬﺮﻳﻦ ﻣﻦ ﺯﻭﺍﺟﻨﺎ ﻭﺑﻌﺪ ﺳﻨﻪ ﺍﻟﻠﻪ ﻛﺮﻣﻨﺎ ﺑﻮﻟﺪ ﺳﻤﻴﺘﻪ ﻳﺎﺳﺮ ﻋﻠﻰ ﺍﺳﻢ ﻭﺍﻟﺪﻱ .. ﺑﻘﺖ ﻫﺒﻪ ﻋﻠﻰ ﺑﺴﺎﻃﺘﻬﺎ ﻭﻫﻴﻪ ﺗﻌﺘﻨﻲ ﺑﺎﻣﻲ ﻭﺻﺮﻧﺎ ﺍﺳﻌﺪ ﺯﻭﺟﻴﻦ ...

ﺍﻟﺘﻘﻴﻨﺎ ﺻﺪﻓﻪ ﻭﺍﺑﺘﻌﺪﻧﺎ ﺻﺪﻓﻪ .. ﻭﺣﺘﻰ ﻟﻮ ﻣﺎﺟﻤﻌﺘﻨﺎ ﺍﻟﺼﺪﻑ ﻧﺒﻘﻰ ﻧﺤﺐ ﺑﻌﺾ ﻣﻦ ﻟﺤﻈﻪ ﻣﺎﺍﻟﺘﻘﻴﻨﺎ _ ﺻﺪﻓﻪ ......