تاريخ النشر : 07/26/2024, 20:17:41

 

              الفضيحة            

 

زكريا وثريا في سيارة حتى الصباح الباكر

 يلتقط هاتفه ويتصل بجبريل

زكريا : صباح الخير عمي اتصلت بيك من الصبح

جبريل : هلو عمي زكريا

زكريا : عمي اني بورطه تعاركت وي نسابتي وهسه همه يردون ياخذون مرتي مني

جبريل : وهسه انته وين ؟

زكريا : كلت اجيك للبيت وهسه اني واكف كبال بيتك

جبريل : يالله جايك

يخرج جبريل من منزله ويترجل زكريا من سيارته يلتقي الاثنان معا وزكريا مرتبك يراقب الطريق خوفا من اخيها علي

جبريل : خيرك عمي

زكريا : جايب أمانه ويايه واريدك تخليها يمك

جبريل : شنو هاي الامانة

زكريا : ثريا نزلي

تترجل ثريا من السيارة مطأطة الرأس وشابكه يديها مع بعضها

ثريا : السلام عليكم

جبريل: وعليكم السلام هلا بنتي ٫ تفضلو

في بيت ثريا :

مستيقضين حتى الصباح الاب في غرفته و اختها براء جالسه في غرفه ثريا تداعب شعر ابنها ادم وعقلها عند اختها ثُريا اما اخيها علي جالس في غرفته وبيده مسدس منتظرا ساعه الصفر بعد ان ذهب الى عمامه كي يوافقوا على غسل عارهم ...

في بيت جبريل ...

بعد ان حكى زكريا القصه الى جبريل

جبريل : هاي مشكله جبيره وراح تروح بيها برجلين ، جان المفروض تبقيها يم اهلها او على الاقل تتصل بشرطه حتى يحموها يعني انته بطلعتك هاي ذبيت حطب على نار

زكريا : مدري وين جان عقلي انته ماشفت الي صار بلبيت لو ماماخذها جان انقتلت المسكينه

جبريل : ابوها شنو ردت فعله ماسولفتلي ؟

زكريا : ابوها وكع من طوله وماكدر يحجي اي شي اتخلى عنها جان المفروض يحتويها يمنع ابنه حتى ميئذيها بس تعرف رجال معروف على مستوى المنطقه والناس تحترمه وتحسبله الف حساب

جبريل : هنَ ذني النسوان يا ما نزلن روس زلم , هسه انته شتريد مني حتى اسويلك حل ؟

زكريا : اريدك تروح ويايه للولد نأخذ العنوان ونروحله نحجى ويا او وي اهله حتى نلكه صوره حل

جبريل : ان شاء الله تعدي على خير

في بيت ثُريا :

بعد حضور عمامها و اولاد عمومتها في بيتهم جالسين كأنهم قضاة جاءوا ليحكموا في القضية ويصدرون الحكم على المتهمة ثُريا التي تكون من جلدتهم ومن صلبهم ومن دمهم الحكم عليها بالموت ذبحا دون رأفه

عمها الكبير موجها الكلام الى ابيها : اني كتلك خلي ازوجها لابني بس انته رفضت كلت لا بنتي اريدها تكمل دراستها وهي شوف حياتها وتختار الشخص المناسب وهسه اختارت الشخص المناسب لو بعدها تتفكر ؟

احد ابناء عمها موجها الكلام الى اخيها علي : اشلون راح تراوي وجهك للناس وانته ما شاء الله من تمشي نافخ روحك ورافع صدرك كدام الناس هسه شلون راح تمشي بين الناس ؟

علي : لا زيد هم فوك همي اني لو مخليني بوكتها جان ذبحتها وافتريت براسها بشارع

احد ابناء عمها : نسيبك زكريا وين اخذها بيا مكان

علي : ماادري ؟ حتى مرته متدري بي وين وتتصل عليه ميجاوب بس ابويه يعرف واحد من كرايبه ميقبل يكول عنوانه وين

احد عمامها : وليش متكول عنوانها ليش تستر عليها بعد مانزلت راسك

الاب : كلكم حجيتوا اشكال حجي بس تبقه بنتي وقطعه من قلبي صحيح اتبريت منها وطردتها من البيت وجان اكدر احتويها والمشكله متكبر بس خانت ثقتي بيها وانطيتها فرصه تعيش واذا لزمتوها فاتمنى مجيبوها للبيت لان راح اتخذ نفس الموقف ..

زكريا وجبريل يبحثون عن بيت مهند حتى يصلون الى احد البيوت يترجلون من السيارة :

زكريا : هذا البيت يمكن ( يطرق الباب )

يخرج رجل كبير العمر

زكريا : السلام عليكم حجي

الرجل : وعليكم السلام تفضلوا

زكريا : حجي جاين على ولد اسمه مهند موجود ؟

الرجل : جان موجود واليوم راح يم اهله

زكريا : ليش اهله وين عمي

الرجل : بتركيا عايشين وكل سنه يالله يجون بس مهند يدرس اهنا وكل ست اشهر يروح ويرجع علمود دراسته واني حارس هنا ياعمي ٫ ماكتولي شتردون منه

زكريا : سمعنه عنده شقه عارضها للبيع وجايين عليها شرايه

الرجل : والله يااعمي ماادري عنده شقه او لا هو دائما يجي للبيت هنا وما فديوم ذاكر شقه او شي

زكريا : متعرف شوكت يرجع ؟

الرجل : والله مااعرف يااعمي

زكريا : تمام عمي اخذ راحتك ازعجناك

الرجل : لا ماكو ازعاج شرفتونه عمي

جبريل و زكريا في السيارة :

جبريل : مقتنع بالحجي انو راح للاهله

زكريا : طبعا لا لان الدراسه بعدهي ماخلصت واكيد بلبيت خاتل لو بشقه

جبريل : وهسه شراح اسوي ؟

زكريا : اني مااكدر ارجع لبيتي لان راح يدخلوني بسين وجيم اكدر ابات يمك هل كم يوم على ماالكه حل

جبريل : هله بيك تدري مااكو احد بلبيت بس اني وميسون

في بيت جبريل

ميسون جالسه مع ثريا

ميسون : صارلج شكد تعرفي للولد ؟

ثريا : من اول سنه تعرفت عليه

ميسون : الولد عادي عدهم يغلطون ويسون الفظائع والفضائح لأن يدري هو ولد اولها وتاليها يكدر يكمل حياته بس البنيه اذا غلطت غلطه وحده بس يقرون عليها السلام اني مجاي اسمعج حجي او ازيد همج بلعكس متعاطفه وياج الوحده من تحب بينه شخص تحبه بكل كيانها وحواسها

ثريا : اني لحد الان مصدومه من الي صار اتمنى يطلع كل هذا حلم واكعد منه

ميسون : المشكله انو موحلم ٫ امج شنو كالت ؟

ثريا : امي بلعمره راحت ومتدري بلي صار

ميسون : خطية ٫ الام الوحيده الي تنفجع بولدها

في بيت ثريا

تعود الام من العمره دون استقبال تهرع الى البيت كأنها تعلم ان هناك مصيبه قد حدثت ترى براء وحدها جالسه في البيت

الام : ثريا شبيها ؟

وكأنها تعلم بان ثريا قد اصابها شيء

براء : حمدلله على السلامه ماما

الام : الله لا يسلمني كليلي ثريا شبيها

براء : ماما بس كعدي واني اسولفلج

الام : وهاي كعدت سولفيلي

اخيها علي وابناء عمها يبحثون عن ثريا في كل الاماكن والطرقات عسى ان يضفروا واثناء ذلك يلمح سياره زكريا تقترب بحانبه ويرى شخص جالس بجانبه

علي : هذا زكريا ويا واحد

احد ابناء عمها : الحك ورا بسرعه

فتبدا الملاحقة ...

في بيت ثريا

بعد ان حكت براء لامها ما اصابهم تنهار الام بالبكاء والحسرة

الام : بس لا قتلوها ؟

براء : لا بس طلعوا يدورن عليها

الام : ابوج وين ؟

براء : بغرفته من طلعوا عمامي لسه ماطلع من الغرفة

تنهض الام وتدخل الى الغرفه ترى زوجها نائم ومعطي وجهه الى الحائط

الام : نايم وبنتك راح يقتلوها ليش ما احتويتها ليش هدرت دمها جاوبني

تقترب الام من زوجها وتمسكه لكي تراه وفجاة تراه فاتحا عينه وفمه

الام تنهد به : عماد .. عماد .. عماد ... ولج براء الحكيني ابوج مات .....